Iríah a la sierra,
a ondeá ayí tu melena negra,
a regal la tierra con lah tuh venah.
...
El caminu’e la sierra
...
Sí,
ibah a la sierra,
Dulce y decidía
y era largu,
mu largu el caminitu,
rayandu ehtaba el día.
en una yegua
primeriza y nobli,
comu’na primavera.
...
Ibah a buhcal·luh,
a loh guerriyeruh que murierun,
a loh chozuh, a lah cuevah,
a loh corazonih dulmíuh
a la sombra de la'ehtoria.
...
Y velayili ehtaban luh cabreruh
y arzaban la cayá
con la su voz valienti:
...
¡Por’ayí, por’ayí arribina
ehtaban ahcondíuh!
Pregúntali a Vitoria
c'anda endurzandu la zurrapa
pa tupil·luh bien tupíuh,
porqui pasan mucha jambri
y tienin loh pieh engurdíuh.
...
Ayí mehmu,
Dulce,
al lainu la choza’e piedra
vihtih a Vitoria,
la Rica Miel y la memoria,
y ehtaban con’eya loh cabreruh de la sierra:
tíu Adolfo el Cayau pal Robleu,
Venancio en lah’Erah'ondah,
Adolfo Izquierdu y la Morena,
tamién luh Chilinih…
y luh lobuh y lah fierah.
...
Habla Dulce a loh cabreruh
...
Oyi, si luh véih dicil·luh
que la libertáh eh sagrá,
que no s’abajin pa ná de lah majáh,
entri lah majanerah’e piedra.
...
Habla la Rica Miel la cabrera
...
Si, sí, yo loh ví el’otru día,
a loh maquih,
aquí mehmu,
al lainu la juenti.
Yo cantaba y hacía el quesu,
menudu suhtu me dierun
hahta que caí qu'eran eyuh,
Y loh tupí bien tupíuh
de suero y jiguh secuh
y eyuh bien m’agraecierun.
Y al’otru día que vinierun
matamuh unuh guarrapinuh,
malandarih al dehteti,
qu'ehtaban mu gordinuh,
y ali payá,
moh luh comimuh con’eyuh
y moh loh pagarun,
eran genti m'umildi y mu güena.
Habla Dulce
...
A mi me lu’iju Pinto
c'andaban paquí embohcauh
dece loh tiempuh aqueyuh
y subimuh enseguía pa la sierra,
valientih,
con lah’alforjah yenah
de’ilusionih y de’ideah.
En el airi
Echa un tragu vinu, amigu,
pa rompel ehti exiliu
que moh comi lah entrañah
comu'n buitri carroñeru.
...
Tía Auria la cabrera
...
ehprimiju abaju.
Asín l’había veníu la cunucencia,
rehfalandu suavimenti
por la sierra’e Cabezuela.
hahta que, a loh cuatru añuh,
se recunució a la vía
en un castañal
mirandu lah’ehtreyah.
...
Un platinu d’ aveyanah
que por’el día s’ehcondin
y por la nochi s’ehparraman.
...
El sueru y la zurrapa
...
Payí se muevi argu,
maríu,
mira a vel si son loh maluh
con el tricorniu a la cabeza,
ay, que no, so tontu,
que son de loh muehtruh,
que train la libertá en la mirá
y un sueñu en bandolera:
Pintu, c'alegría,
y vieni con’el tíu Picoti,
qué güena cumpañía.
Amuh, amuh,
entral por'esa puerta
pa’entru a la majá,
que oh vu’a tupil de sueru
hahta que oh'impléih bien himplauh,
comu loh chivinuh por lah tardih
candu ayegan lah cabrah al chiveru
y se ponin loh’ociquinuh albedríauh
chuperreteandu'e la ubri el sueru.
...
Habla Dulce
...
Yo loh vi,
a loh valientih guerriyeruh,
en el cielu y en loh güertuh,
y yenaban a bolbotonih,
con el sueñu d'otruh tiempuh,
loh güecuh fríuh de lah balah
en ehpera de loh besuh.
...
Habla tía Auria la cabrera
...
Mira, Dulce,
mira bien parriba,
payí ehtá el Camochu'e la Gama
y el su hermanu Majalahnu
y la cueva de luh Maquih,
ondi no farta l’ehperanza.
Dali a esa jaca lozana
paque te suba hahta eyuh
comu a una hermana.
...
Habla Dulce
...
Amuh bien a priesa,
mi cabayu volanderu,
amuh,
amuh ayí arribina,
a divisal como lo hacin lah’aguilah.
...
Habla tía Auria
...
Tíu Ángel
en loh prauh'e la sierra,
qu'ehtán paríax lah guarrapah
y tieni tiempu pa’ordreñá lah cabrah.
Pol la nochi moh guardamuh
en un caseretinu
y bemuh pasau muchu miéu
en tantuh añuh'e la guerra.
Co}u aqueya vej
c'habían yegau
loh civilih por la nochi
y hacía muchu fríu,
Trohtearun a la puerta,
y ayí se quearun a la lancha la lumbri
hahta que s’abajarun lah’ehtreyah.
Aluegu ya su juerun
con vientu ehpesu.
Ojalá nunca güervan.
...
lah cabriyah se ponin al’amanecel
...
Peru eyuh siempri,
loh güenuh guerriyeruh
siempre ehtuvierun con musotruh
y sino,
mira comu vienin a la juenti
loh suh amiguinuh
a buhcal el’agua frehca
a l'ehtanti que la sed aprieta.
...
Habla un cabreru’e la sierra
...
Si, sí, se m’aparecierun,
unuh guerriyeruh,
y m’ijerun que conmigu no’iba náa,
que no juera usau abril’la boca.
Y siguierun el caminu
con lah botah y lah ehcopetah a cuehta.
amuyendu lah patatah
y vinierun y leh di una arroba
y un cuartiyu’e vinu,
¡Si ehqui tamién son hombrih
y tienin mu honduh idealih!
Polqui mira,
una guerra eh lo peol,
Y el’olvidu…
el’olvidu eh com’un fuego
que tó lo devora y arruina.
...
Habla Dulce
...
Yo m’acueldu,
lo vi en los'ojuh de lah suh mujerih
y en el jierru de la voz que clamaba
y no s'oía.
Se enfrentaban y mataban loh’ermanuh,
comu perruh.
Amuh,
amuh prehtu ayí arribina,
mi cabayinu ligeru,
a ehcucharluh suh relatuh
y a querel·luh comu se quieri
al amigu sinceru.
...
Loh camaradah
...
Payí arribotona,
en lo artu de lah cumbrih,
andaba Joxizquieldu
alró lah vacah del su agüelu,
y lu vió tóo,
com'un ecu atronandu en la cabeza.
Sí, sí, en’ehti mehmu pueblu,
en’el Torno, en la sierra,
vió salil pal frenti
a Jacintu y a tíu Pablo,
a Silvianu y a tiu Eladio,
a tíu Pelajiguh y a Ahteriu el Rata
y a muchuh otruh, comu hermanuh.
Y lah madrih,
y luh’ijuh chequininuh,
comu’na diminuta gota d’ehperanza.
Y vihti a Adolfo Izquierdo
ehcondíu en lah’Erah Jondah,
endihpuéh lu bien que s’había portau con to’er pueblu.
Peru hoy ya s’han íu,
loh probih guerriyeruh,
ya no quean en la sierra,
Solu el’ecu de lah piedrah.
...
Habla un jovin torniegu
...
ehtaban ehcondíuh
en lah majanerah
aguardandu a que vinieran
con Dulce y cumpañía
a la sierra.
El’otru día
ehtuvierun pahquí mehmu,
en’el yanu0Vaquerizah,
y cantaban y reían
y recitaban versuh tielnuh
¡Y mu alegrih!
Porqui eyuh,
eyuh son l’esencia y la yerba güena,
de luh canchuh, de luh roblih,
de loh tiempuh venieruh
y tamién ehtaba eya,
Una mujé juerti,
jonda y morena,
y s'abrazaba a Pinto
confundíuh dambuh ya en la tierra.
...
Habla Dulce
...
Yo loh vi
Y guardu esi momentu en la sesera
pa endihpuéh ehpal·cil·luh pol’uh’airih
paqui tó er mundu lo sepa
Amuh, amuh ayí arriba,
mi yegua primeriza,
súbime a loh cieluh,
Pa que ajondi mih raicih
Y m’ehparza eternamenti
en lah Vaquerizah de la sierra.
...
Habla Dulce Chacón
...
Tengu sed,
Darmi agua,
darmi mucha agua
que quieru cumpartirla,
pa lah cabrah,
pa loh chotinuh,
que vienin toituh luh díah ,
pa loh niñuh que juegan
en la juenti nueva,
a bolindrih y a peonzah
y a jacelmi caraba tierna.
Porqui tóoh m’engendran
y m’aventan,
yo soy la tierra,
eyuh la sementera que se riega.
...
Yo oh saqué de l’ehpesura de la ehtoria
y ya no oh’abandonu.
Aquí’eju el mi sembrau,
unuh libruh y un’arbulinu
y luh versus en luh labiuh.
...
Dulce Chacón, en las Vaquerizah pa siempri y, manqui pasi el tiempo, en luh muehtruh corazonih presenti, y en El Torno, Dulcimenti.
Setiembre 2004
No hay comentarios:
Publicar un comentario