Mar de nubih

Mar de nubih preñáh de nievih,
 pahmáh d'ocri de fríu invielnu,
blanca lechi en lah ubrih de la sierra
pa sorbé ehperanza de vía güena.

Esuh rizuh comu puñalih congelauh
pa que no moh orviemuh
de loh ermanuh muertuh
que yacin baju la tierra
comu animalih salvajih
abandonauh al desamparu
al que loh confinó una guerra.

¿Hahta cuandu derramauh loh suh cuerpuh
en loh campuh,
en lah cunetah,
en lah fosah comunih
a la puerta'e loh cementeriuh?

Mar de nubih comu lechuh de algodón
arruyandu sentimientuh
pa que loh güesuh fríuh
que siembran la tierra se regüervan
contra el orvío,
se levantin comu linternah en meyiu'e lah turmentah.

Mar de nubis,
sí,
mar de vientu y sementera,
en loh canchalih,
en el alientu de loh lobuh
que envenenan de libertá la sierra.

Lah afotinuh son de Joxe Izquierdo. Gracias.